Springrid

Jentebølgen?

Eg vurderer å vera med på denne:

Trondheim sentrum, 5. juni kl. 19.00

For:

• kjekt å springa!
• meir løpserfaring
• får konkurrert med folk på den måten eg likar: å ta dei igjen. Blir like glad kvar gong
• ein tysdag klokka sju passar fint

Mot:

• Det ser litt sånn skrekkeleg festleg ut, av typen “nå er vi gærne, dere.” Men det er sikkert lov å vera med utan å kle seg ut.
• Underhaldning langs vegen. Eg veit ikkje kva eg skal forventa.
• Litt dyrt
• Det er kvelden før eksamen, men det treng ikkje ha noko å seia
• Får ikkje eigenleg trena for det, må prioritera eksamensførebuing

Så, eg veit ikkje. Påmeldingsfrist 30. mai. Skal du springa Jentebølgen?

Who wears short shorts?

Oppdatering: Har skrive nokre sider som kan bli eit eksamensforedrag, men veit ikkje om eg er på rett spor. Skreiv mykje i går, mindre effektiv i dag, men har lese ein del.

I går skreiv eg så mykje at hovudet blei tomt allereie halv tre, så då dro eg heim og fekk sprunge intervalløkta mi. Det skulle vera “lang bakke”, så eg fann den lengste bakken eg veit om i byen (med unnatak av vegen til Skistua, som hadde vore eit betre val, men det er langt dit). Eg sprang til Bakklandet og la i veg opp Singsakerbakken (som går over i Jonsvannsveien (?) og oppover mot Tyholt).

Eg tenkte å gjera økta som ein stige, 1 + 2 + 3 + 4 + 4 + 3 + 2 + 1 minutt med høg puls. Innimellom draga gjekk eg eit halvt eller eitt minutt. Det som var dumt, var at byen er alt for låg. Midtveges i den første firaren var eg kome til NRK, og det var ingen fleire motbakkar i sikte. Så då sprang eg bortover flatene så fort eg kunne. Etter ei stund hadde eg kome litt nedover, så eg fekk snudd og sprunge den siste einaren i motbakke. Så jogga eg heim.

Fin økt, men for kort bakke. Totalt blei det 52 minutt, 20 minutt med høg (men ikkje veldig høg) puls, noko som var OK, men det kunne vore meir av alt. Det spørs om eg eigentleg rekk å springa ein liten tur i kveld, men eg har lyst.

Å, ja, og så var det veldig varmt, og eg hadde på meg den korte kortikken då eg sprang. Eg veit det er eit plagg mange har lagt for hat, men det var det einaste fornuftige i varmen i går, trass i mine triste, skummamjølkfarga bein (som heldigvis blir rosa av springing, det ser trass alt litt friskare ut. Men bilde får de altså ikkje). Eg såg det var mange andre som var bleike i går òg, i Høgskoleparken, til eksempel. Eg såg òg nokon i solveggen på Dragvoll som hadde gått bananas med sjølvbruning, og sa til meg sjølv at den fella skal eg ikkje gå i i år. Det var fint altså, berre litt mykje.

(denne, men med rosa stripe. Haters gonna hate!)

Kvar blei det av mai månad?

Eg får utdelt eksamensoppgåva mi i morgon, og skal jobba med den i fjorten dagar. Eg veit ikkje kor mykje tid det kjem til å ta, eller korleis det skal gå generelt. Likevel har eg planlagt masse trening. Det kan vera greitt å tenkja på andre ting òg, og trening gjer meg glad. Så må det vera lov å prioritera eksamen viss det viser seg at eg ikkje får tid til å trena.

Knebøy og langtur

Hei! Skuldra mi er betre enn for ei veke sidan! Veit ikkje om det er treninga (skulder-rehab-øvingar og press-øving-pause) eller betennelsesdempande salve som har gjort det. Sikkert lurt å kombinera. Blir kjekt å gjera litt fleire overkroppsøvingar på styrketreningsdagane, for beina blir så overraska over den ekstra merksemda.

I går varma eg opp med goblet squats, og det trur eg gjorde at knebøyen min blei meir vertikal. Ofte er det lett for at eg får overkroppen litt langt fram (typisk for oss med lange bein og korte ryggar). Eg har jobba med hoftemobiliteten, men eg trur goblet squats hjalp vel så mykje. Det kan ha vore den nye og betre teknikken som gjorde at eg var litt svak i går, eller så var det berre dagsforma. Det blei berre to arbeidssett i staden for tre. Oppvarminga kan ha vore for hard òg, når eg tenkjer over det.

I dag skulle eg springa ein roleg langtur, og det blei det. Vêret var perfekt, ni gradar, nesten vindstilt, overskya og tørt. Det blei 14 km på 1:20, noko som gir ei snittfart på 10,5 km/t. Det er raskara enn langturfarta sist eg var i form (i 2010), men eg opplevde det som roleg. Det er kjekt. Då eg kryssa Vollabakken/Klostergata for andre gang i dag, fekk eg ein spontan kompliment frå ein forbipasserande, middelaldrande mosjonssyklist. Eg lurte på om eg kjende han, men eg trur ikkje det. “Dæ, kor lætt du spring!” ropte han. Hæ, tenkte eg (medan eg sa takk) men ja, det gjekk jo faktisk ganske lett, så uansett kvifor han sa det, blei eg glad.

Morgon-tempo

I dag tidleg skulle eg springa 5 lette km, men eg hadde visst litt ekstra energi frå i går, og det gjekk så det kost. Plutseleg var treninga ei teknikk-trening, og eg fekk ganske dreisen på å sparka hælane opp bak (og så trekkja føtene fram med å løfta knea) slik at føtene blir litt meir som hjul. Eg pusha tempoet nesten heile vegen.

Det starta roleg, men då eg var kome til Øya stadion, sprang eg som ein vind. Eg var veldig andpusten på flata bortover frå Ila kyrkje til Trondheim Torg, og då eg kom til Gamle bybro var det omtrent ikkje meir att. Bakklandet er ei falsk flate, og eg pressa ganske hardt opp Vollabakken. Då var eg nesten framme, og spurta heim så godt eg kunne. Så kjekt å få opp farta litt!

Eg var viss på at dette gjekk superraskt, men i følgje klokka tok det 27 minutt. Der er det nokre feilkildar; til eksempel såg eg på mobilen og ikkje stoppeklokke, så ein kan trekkja frå mellom 0 og 2 minutt, men veit ikkje akkurat kor mykje. Vidare kan ein trekkja frå omtrent eit minutt der eg stod og venta på å kryssa gata. På den andre sida kan desse stoppa ha gjort at eg klarte å springa fortare etterpå (men kanskje ikkje så mykje? det viktigaste for å få ei god tid er jo å halda seg i rørsle). Det skal bli spennande å sjå kor fort eg kan springa 5 km på skikkeleg.

16. og 17. mai

I går skulle eg trena styrke. Då vi kom til treningssenteret, hadde det nett stengt tidleg sidan det var 17. mai dagen etter. Det kunne vi jo ha sjekka, og eg var skuffa, men berre ei lita stund. Eg meiner, om eg misser berre ei styrketrening denne veka, så har eg ikkje vondt av det, heller tvert imot.

Eg vil gjerne dela ei rask oppskrift på ein middag som vi åt når vi skulle skunda oss på teater på tysdag (Hair!): Kylling i kokosmjølk frå matprat.no. Nydeleg med kokt eple og karri i sausen, og lettvint med kyllinglår.

I hagen er det vår på skikkeleg, og no som vi har blitt kvitt den gamle boden som vi reiv ned, fekk eg plass til å slå graset og litt anna, som til eksempel gjødsling (det var jo meldt regn i dag). Sjå kor fint bed i vinraudt, gulkvitt og blått!

I dag har vi vore til byen for å sjå om vi kunne sjå litt på toget, men det var surt og kaldt, og vi gjekk på kafé. Resten av dagen var vi i lag med familie og fekk fantastisk god mat :) Nydeleg potetsalat med kapers, spekemat, spansk ost, jordbær- og mangosalat, pølse, kake, gelé, bollar, osb. Trilla lukkelege heim og tok dette bildet. Gratulerer med dagen!

1000 meter er ikkje så langt

No ser det ut til å bli styrketrening i morgon kveld, så eg flytte intervalltrening til i dag. Eg tenkte å springa til Øya stadion og ta det der. Der var det noko som såg ut som ein gymtime på ungdomsskulen, så eg sprang vidare. “Hm,” tenkte eg, “skal eg springa bakkeintervall i Steinberget?” “Neei, det gjorde eg sist veke, må ha litt variasjon, eg skulle jo springa tusenmetersintervall for auka løpsstyrke osb.” No hadde eg kome til Ila kyrkje. “Kva med å berre ta ein lett liten tur den vanlege runden? No har du jo kome over halvveges”. “Nei, eg har så mykje planlagt denne veka, det må vera ei hardare økt i dag, elles går det ikkje opp”. Omtrent her møtte eg skuleklassen som var på veg attende til skulen, og eg sprang over den lange gangbrua over elva og bort til stadion. No var det berre nokre blåruss som kasta spyd på indre bane, så då hoppa eg over gjerdet og trykte på stoppeklokka mi. Her er mellomtidene på tusingane:

1. 4:50 (perfekt!)
2. 4:50 (wow, likt, jo)
3. 5:00 (?)
4. 4:47 (yess!)
5. 4:43 (blodsmak i munnen)

Dette var superkjekt! Totalt blei det 9,6 km på 48:35. Eg er enormt nøgd! Ser at det blir hardt å springa 5 km på under 25 minutt, men det er faktisk fysisk muleg, viss eg får jobba meir med kondisen først. Kanskje eg skal ha bakkeintervallar att neste veke!

(neida, det var ikkje noko skilt)

Vekeplan

Okei, dette er kjekt: Eg er korkje stiv og støl eller tung i beina i dag, som eg kanskje ville trudd at eg var, med tanke på den førre veka. Skal ikkje sjå vekk frå at eg toler fem økter i veka no. Eg ser i alle fall fram til å starta på denne treningsveka.

Eg skal halda fram med skulderøvingar, og må tilpassa styrketreninga slik at eg unngår belasting der det gjer (har gjort, for å vera optimistisk) vondt. Hm.. no kjem eg på at det er 17. mai på torsdag. Kanskje den lette løpinga blir flytt til fredag, det har ikkje så mykje å seia.

Roleg langkjøring i dag, 12 km utan klokke, men det må ha gått rundt ein time og ti minutt. Då eg kom til Bakklandet på den første runden, sa det eine kneet at no tok det til å nærma seg mange nok kilometer denne veka. Det hadde kneet forsåvidt rett i, så eg var klar for å kutta turen på halvvegen, men det gjekk over, og eg kosa meg. Særleg når det var medvind. Mykje vind i dag.

Denne turen var mykje rolegare enn den på måndag. Kvifor så roleg?

1. Beina var trøtte, og eg ville berre putta ein del kilometer inn i beina utan å ta i for mykje og eventuelt få vondt.
2. Eg er viss på at eg var i i-sone 2 heile vegen i dag, og det er ein triveleg plass som aukar den aerobe kapasiteten. Ofte kjem eg ut av den på langturar og opp i i-sone 3, og eg er redd det kan vera ei felle å gå i, som av og til blir omtala som det svarte holet. Sjå bildet av boksida her. På den andre sida, raske langturar har absolutt ein plass i eit treningsprogram. Men i dag var ikkje dagen for det.

No gler eg meg til ein treningsfri dag, og til å eta litt meir smågodt før helga er over. Snakkast!