Springrid

Framgang på fleire frontar

I dag har eg vore på jobb. Jodå. Ein liten tur, berre. Veldig kjekt.

I går blei det ein liten løpetur,

• 8 km
• 46:33 
• lang ventetid i lyskryss
• kjendest veldig bra

Etterpå fekk vi tunfiskpasta, som er veldig godt, eg steikjer kapers, kvitlauk, chili, timian, tunfisk frå boks, saft og skal av ein sitron, og blandar inn kokt glutenfri spaghetti og cherrytomatar. Skulle òg hatt bladpersille, men hadde ikkje det denne gongen.

I kveld har eg sprunge 9 x 400 m. Her er mellomtidene:

• 1:38
• 1:35
• 1:37
• 1:35
• 1:36
• 1:40
• 1:38
• 1:37
• 1:35

Det er ganske jamnt, er det ikkje? Det som òg er kjekt, er at alle desse tidene er mykje betre enn tidene mine frå starten av månaden! Framgang er motiverande.

Utruleg nok føregjekk denne fine treningsøkta etter denne fiberrike middagen (det hindra meg faktisk ikkje i det heile under intervallane): Vegetar-chili - ein av studentmiddagane mine, her er det verkeleg mykje næring for lite pengar og liten innsats. Steik lauk, gulrot, tomat, ha i chilibønner og krydder og lat det koka godt saman. Eg serverte med riven ost og laktosefri lettrømme.

Sommarmat

No har eg hatt fri i to veker (wow, tida har berre floge). Det har vore litt varierande vêr og sånn, men det har uansett vore kjekt. Til eksempel har eg hatt god tid til å laga mat. Her er tre ting som blei skikkeleg bra:

Salat med quinoa kokt i eplejuice, avocado, tomat og kjøttbollar (mager svinekjøttdeig, ein neve glutenfritt brødrasp, eit egg og krydder), med parmesan og dressing av kvalitetsolivenolje og lime.

Glutenfri spaghetti med røykelaks, tomat og fennikel, saus av lauk, kvitlauk, kremost med urter og laktosefri matfløyte.

Torskefilet med serranoskinke, poteter med pesto og tomatar.

Elles har det blitt mykje trening, jobbsøking, hus- og hagearbeid, snekring og maling. Håpar eg får ein jobb snart.

Kvardagsmat

Laks med potet, fennikel, raudlauk, agurk og laktosefri lettrømme.

Ytrefilet av svin med potetmos, asparges og reste-fennikel+lauk

Glutenfri spaghetti med mager svinekjøttdeig, tomat, gulrot, chili, lauk og kvitlauk.

Ytrefilet av storfe med tomat, avocado, salsa og ris.

Den siste dagen var vi i middagsbesøk og fekk servert nydeleg bacalao :)

tl;dr? Denne veka blei det fisk to gonger, svin to gonger og ein liten biff. Burde vera bra å trena med dette innabords, tenkjer eg.

Ei lita oppsummering laurdag-måndag (har vore opptatt, men er her, trenar og lagar mat som før).

Langturen på søndag blei ikkje som planlagt. Eg hadde ete for mange drageegg kvelden før, og var ikkje heilt i form, og kjærasten hadde ein fotballskade. Vi sprang 5 km, han gav seg, eg tok ein drikkepause, og sprang 5 km til. Det skulle ha vore 12 rolege, men det blei 10 rolege. Med pause. Det var OK.

Den tunge styrketreninga i går gjekk supert, for min del.

• Knebøy med 50 kg for første gong, 4 x 4 blei det. 
• Nedtrekk, 40 kg, 4 x 4-5 (hugsar ikkje kor mange i kvart sett, men 4 eller 5).
• Skråbenk, 14 kg per arm, 4 x 5 for første gong.
• Roing, fekk ikkje tatt omvendt roing, så den blei sittande, 40 kg x 4 x 8.
• Rumenske markløft, 50 kg x 8 + 54 kg x 3 x 5.

Her er vekeplanen, som eg alt er i gang med å gjennomføra:

Og her er søndagsmiddagen, spaghetti med kjøttbollar. Heimelaga kjøttbollar, så klart. Dei inneheld: Ein pakke kjøttdeig, eit egg, ein neve glutenfritt brødrasp, ein neve finhakka cashewnøtter, ein neve hakka persille, salt og peppar. Sausen er berre steikt lauk og kvitlauk med olivenolje og ein boks hakka tomat, salt og peppar (sausen hadde sikkert gjort spaghettien raudare og finare viss eg hadde nytta stavmiksar, men smaken var god). Spaghettien er glutenfri, og på toppen er det parmesan (harde ostar inneheld omtrent ikkje laktose).

Til slutt, og ikkje-relatert til mat og trening, eg veit det, kan eg nemna at det er vår i hagen:

Kvardagsmat, veke 11

Tunfiskspaghetti, ein spaghettifavoritt! Den har glutenfri spaghetti, tunfisk, kapers, sitron, kvitlauk, chili, timian, persille, og tomat.

Kyllingfilet med quinoa, gulrot og lauk. Enkelt, raskt og proteinrikt:

Burger: karbonadedeig, egg og potetmjøl, steikt og servert i glutenfritt rundstykke med avocado, tomat og ketsjup. Dei er ute av fokus, sidan eg måtte skunda meg og eta dei :)

Sei-gulasj med potet og laktosefri lettrømme.

Alle middagane tar under ein halv time!

Kvardagsmat, veke 10

Glutenfri spaghetti med røykelaks, saus av urte-kremost og laktosefri matfløyte, lauk og tomat:

Omelett for ein person, med to egg, og paprika, toppa med ein avocado med limesaft over, riven ost, og salsa. Og glutenfri knekkebrød. Det var veldig, veldig godt!

Tunfisk-wok med gulrot, gul paprika, kvitlauk, cherrytomat, cashewnøtter, thai red curry-saus, og ris.

Den fjerde dagen åt vi ute, og i dag skal vi på hyttetur. Håpar å få gått på ski! Så langt denne veka har eg berre sprunge ein gong og hatt ei tung styrke-økt. Det er greitt, sidan eg planlegg ei aktiv helg :)

Vekeplanlegging! Har hatt ein god pause og blitt kvitt forkjøling, og samstundes fått gjort unna …det meste, håpar eg.

• Måndag: spaghetti carbonara og salat, styrketrening (maksstyrke, 5 x 5)
• Tysdag: veit ikkje kva vi skal gjera og ha til middag enno, men det blir siste kveld i Trondheim før jul
• Onsdag: Heim til mor, veit ikkje kva det blir til mat onsdag-fredag, men kan oppdatera..
• Torsdag: Intervalltrening, motbakkeløp (4x4)
• Laurdag: to middagar; graut og pinnekjøt - yay! (Må hugsa å kjøpa laktasetablettar for å unngå unødig stress for mormor viss eg plutseleg skulle krevja eigen allergigraut)
• Søndag: Ribbe, yay igjen. Skal leggja inn roleg langkjøring laurdag eller søndag. Kan føregå på ski, viss det er snø på Vestlandet.

Gler meg!

Her er den beste, mest ekte carbonara-oppskrifta (eg nyttar så klart glutenfri spaghetti), frå dinmat.no (bildet er derifrå òg).

I dag hadde eg enormt lyst på spaghetti, og fann denne oppskrifta frå VG. Det var supergodt! Både salt og fresht med sitronskal, tunfisk og kapers. Eg nyttar så klart glutenfri spaghetti, eg tilsette cherrytomatar til slutt slik som på bildet, og så syntest eg det var så rart at oppskrifta ikkje hadde kvitlauk, så det hadde eg i. Elles var det veldig lett, og eg trong berre kjøpa ein sitron og ein boks tunfisk. Litt lite grønt i denne retten, men eg kan vel ta ei gulrot eller noko sånt seinare for å få fem om dagen i dag òg.