Springrid

Framgang på fleire frontar

I dag har eg vore på jobb. Jodå. Ein liten tur, berre. Veldig kjekt.

I går blei det ein liten løpetur,

• 8 km
• 46:33 
• lang ventetid i lyskryss
• kjendest veldig bra

Etterpå fekk vi tunfiskpasta, som er veldig godt, eg steikjer kapers, kvitlauk, chili, timian, tunfisk frå boks, saft og skal av ein sitron, og blandar inn kokt glutenfri spaghetti og cherrytomatar. Skulle òg hatt bladpersille, men hadde ikkje det denne gongen.

I kveld har eg sprunge 9 x 400 m. Her er mellomtidene:

• 1:38
• 1:35
• 1:37
• 1:35
• 1:36
• 1:40
• 1:38
• 1:37
• 1:35

Det er ganske jamnt, er det ikkje? Det som òg er kjekt, er at alle desse tidene er mykje betre enn tidene mine frå starten av månaden! Framgang er motiverande.

Utruleg nok føregjekk denne fine treningsøkta etter denne fiberrike middagen (det hindra meg faktisk ikkje i det heile under intervallane): Vegetar-chili - ein av studentmiddagane mine, her er det verkeleg mykje næring for lite pengar og liten innsats. Steik lauk, gulrot, tomat, ha i chilibønner og krydder og lat det koka godt saman. Eg serverte med riven ost og laktosefri lettrømme.

Sommarfest for éin

Kva skal ein eta når ein er åleine fordi kjærasten er på sommarfest med jobben og ein har det travelt sidan ein har vore lenge på skulen og skal på trening etterpå? Noko som ikkje treng steiking eller koking, kanskje?

Tunfisksalaten min inneheld:

• ein neve isberg
• ein neve nydelege cherrytomatar
• 5 cm agurk
• ein boks tunfisk
• 100 g cottage cheese (CC)
• 1 kapsel med laktase (for å hjelpa meg med å spalta det vesle som finst av laktose i CC)
• salt og peppar
• ein splæsj sitronsaft
• 1 ss kvalitets-olivenolje

Her har eg rørt saman tunfisk og CC+laktase med salt og peppar, og rørt saman sitron og olje til dressing, og lagt alt oppå salaten. Men Springrid, seier du kanskje, er ikkje dette veldig lavkarbo? Nei, seier eg, sjå til venstre, der er det to varme, glutenfri stykke ciabatta (med smør).

I glaset: Sitron- og limesafta til Lerum :)

Dette var ein næringsrik middag (mykje protein, mykje fine mikronæringsstoffar, og blei eg mett? Enormt.), og det gjekk aldeles strålande å trena styrke etterpå. Skuldra mi kjennest betre, så eg fekk gjort dette:

• knebøy (arbeidssett på 53 kg)
• rumenske markløft
• skulderpress med stang
• nedtrekk
• benkpress med manualar
• pendlay-roing
• push-ups
• planke

Det var ei flott økt! No har eg drukke opp sjokomjølka mi, så god natt!

Kvardagsmat

Eg blir ikkje lei av kvardagsmat! Det er så mykje forskjellig ein kan laga.

Kotelettar, potet og restesalat med restefetaost.

Pannekaker! Glutenfrie. Oppskrifta mi er her. Blåbærsyltetøy og bacon.

Kyllingfilet, raude linser, ris, lauk og tomat.

Tunfisk, lauk, chili og gulrot, med quinoa og spinat.

Pizza! Den er glutenfri (oppskrift her), og som eit eksperiment, er deigen tilsett ein skup myseprotein med nøytral smak, for å laga fleire proteinbindingar, som ei venninne som kan alt om næringsmiddel tipsa om. Gluten er jo protein, så når det ikkje er det i deigen, kan den bli kompakt, tørr, utan synlege boblar, og alt det der. Denne deigen blei betre å jobba med! Framleis ikkje tynn og sprø (deigen altså), men det kan ha noko med utbakinga å gjera, det. Absolutt verdt eit forsøk til!

God helg!

Kvardagsmat, veke 11

Tunfiskspaghetti, ein spaghettifavoritt! Den har glutenfri spaghetti, tunfisk, kapers, sitron, kvitlauk, chili, timian, persille, og tomat.

Kyllingfilet med quinoa, gulrot og lauk. Enkelt, raskt og proteinrikt:

Burger: karbonadedeig, egg og potetmjøl, steikt og servert i glutenfritt rundstykke med avocado, tomat og ketsjup. Dei er ute av fokus, sidan eg måtte skunda meg og eta dei :)

Sei-gulasj med potet og laktosefri lettrømme.

Alle middagane tar under ein halv time!

Kvardagsmat, veke 10

Glutenfri spaghetti med røykelaks, saus av urte-kremost og laktosefri matfløyte, lauk og tomat:

Omelett for ein person, med to egg, og paprika, toppa med ein avocado med limesaft over, riven ost, og salsa. Og glutenfri knekkebrød. Det var veldig, veldig godt!

Tunfisk-wok med gulrot, gul paprika, kvitlauk, cherrytomat, cashewnøtter, thai red curry-saus, og ris.

Den fjerde dagen åt vi ute, og i dag skal vi på hyttetur. Håpar å få gått på ski! Så langt denne veka har eg berre sprunge ein gong og hatt ei tung styrke-økt. Det er greitt, sidan eg planlegg ei aktiv helg :)

Eg er mykje betre, takk til kvitlauk, solhatt osb. Berre litt tett i nasen no. Skal springa i morgon. Etter skulen blir det ein omfattande handletur for å skaffa ingrediensar til mine første glutenfrie pepparkaker. Eg er berre måteleg håpefull, for dei fleste glutenfrie deigane er ubrukelege til alt anna enn berre å smøra utover bakepapir eller oppi brødformer. Resultatet får de på søndag.

Dagens middag for ein person er ein personleg klassikar frå dei tidlegaste studentdagane: Steik lauk, kvitlauk (masse, sjå tidlegare innlegg om forkjøling), ingefær, paprika og brokkoli i panne, tilset ein boks tunfisk, hell over glutenfri soyasaus, masse peppar og svært lite salt, server med kokt ris. Mykje næring for lite pengar det der.

I dag hadde eg enormt lyst på spaghetti, og fann denne oppskrifta frå VG. Det var supergodt! Både salt og fresht med sitronskal, tunfisk og kapers. Eg nyttar så klart glutenfri spaghetti, eg tilsette cherrytomatar til slutt slik som på bildet, og så syntest eg det var så rart at oppskrifta ikkje hadde kvitlauk, så det hadde eg i. Elles var det veldig lett, og eg trong berre kjøpa ein sitron og ein boks tunfisk. Litt lite grønt i denne retten, men eg kan vel ta ei gulrot eller noko sånt seinare for å få fem om dagen i dag òg.